Ekimen solidario honen 29. edizioa gaur egingo da lurraldeko hainbat igerilekutan
Gaur izango da Arabako Esklerosi Anizkoitzaren Elkarteak (Aemar) antolatzen duen Busti zaitez elkartasunezko kanpainaren 29. edizioa. Euskadin udako hitzordu solidario ezagunetakoa dugun kanpaina hau lurralde historikoko igerilekuetan egingo da.
Gorka Urtaran Gizarte Politiken Saileko foru diputatuak gaur goizean ekimenaren aurkezpenean parte hartu du Arkabia kultur etxean, erakundeetako hainbat ordezkarirekin batera. Horrez gain, adierazi du Arabako Foru Aldundiak babesa ematen diola kanpaina honi eta Aemarrek esklerosi anizkoitza duten pertsonen eta haien familien alde egiten duen lanari.
Hala, eta ildo horretatik jarraituz, kanpainaren helburua da gizartea sentsibilizatzea eta funtsak biltzea errehabilitazioko, arreta psikologikoko eta gizarte laguntzako funtsezko zerbitzuak finantzatzeko, ezinbestekoak baitira kaltetutako pertsonen bizi kalitateari eusteko, azpimarratu dute Arabako Foru Aldundiatik prentsa ohar baten bitartez.
Asteburuan, ekimena Arabako hainbat herritan izango da –lehenago jarduerak egingo dira Alegría-Dulantzin eta Bastidan–, eta igandean izango da ekitaldi nagusia Estadio Fundazioaren igerilekuetan, bai eta Mendizorrotzan, Gamarran edo Aldayeta Klub Nautikoan ere.
Busti zaitez kanpainak keinu sinboliko batekin parte hartzera gonbidatzen ditu herritarrak: igeri egitea edo bainu bat hartzea, Araban 400 pertsona baino gehiagori eragiten dien gaixotasun neurologiko kroniko honekin bizi direnei laguntzeko, Arabako Foru Aldundiatik ondorioztatu duten bezala.