A-2134 errepideko erdiko erreietan ezarri duten tratamenduak gidariak ohartaraztea eta frenatze tartea %45 murriztea du helburu
Arabako Foru Aldundiak tratamendu berezia eman die A-2134 errepideko erdiko erreiei, Zurbanorako sarbideko bidegurutzean, gune horretako bide segurtasuna hobetzeko asmoz. Esku hartzearen ondorioz, alde batetik, kolore gorriko pigmentoa eman zaio galtzadari, bidegurutzean gidariak ohartarazteko, eta, bestetik, zimurtasuna eta itsasteko gaitasuna areagotu zaizkio galtzadari, frenatze tartea murrizteko.
Foru erakundetik azaldu dutenez, marruskadura handiko zoladura pigmentatua erabiltzea behin-behineko eta aldi baterako neurria da, harik eta Arabako Errepideen Plan Integralak jasotzen duen behin betiko irtenbidea gauzatu arte, hau da, errepidearen erreforma integrala eta bidegurutzean desnibeleko lotune bat eraikitzea.
Jon Nogales Mugikortasun Jasangarriaren eta Bide Azpiegituren Saileko foru diputatuak urte hasieran eman zuen Zurbanoko bidegurutzearen segurtasuna hobetzeko aurreikusitako jarduketen programaren berri Arabako Batzar Nagusien osoko bilkuran. Beste ekimen batzuren artean, azterlan bat iragarri zuen, gidarien arreta erakartzeko galtzada kolorez margotzean datzan prebentzio neurri baten bideragarritasuna baloratzeko.
Orain, eta azterlan horren ondorio positiboak jaso ondoren, Mugikortasun Jasangarriaren eta Bide Azpiegituren Sailak egin beharreko lanak egin ditu tratamendu berezia aplikatzeko. Tratamendua gorriz pigmentatutako agregakinezko poliuretano erretxin bidezkoa da eta errepidearen erdiko erreien 100 metroko tartean eman da, bi noranzkoetan, bidegurutzera iritsi aurretik.
«Tratamendu honek bi funtzio nagusi ditu: gidariei ohartaraztea bidegurutze horretara hurbiltzen ari direla, eta, gainera, zoruaren zimurtasuna eta itsaspen gaitasuna handitzea, larrialdietan frenatzeko tartea murrizteko. Gainera, bidegurutzean dauden gidariek bidegurutzean gerta daitezkeen mugimenduei buruz duten pertzepzioa hobetzen du», azaldu du Jon Nogalesek.
Arabako Foru Aldundiko Laborategi Orokorreko Zerbitzua arduratuko da zehaztapen horiek betetzen direla eta eraginkorrak direla kontrolatzeaz. Zehazki, eta hainbat analisi eta txostenen arabera, tratamenduak aukera ematen du frenatzeko tartea %45 murrizteko, zoru lehorrean zein bustian, eta, beraz, talkak saihesten laguntzeaz gain, gertatuz gero, larritasuna arintzen laguntzen duen elementua da. Era berean, bideko istripu tasa %35 jaisten du, eta, horregatik, Trafikoko Zuzendaritza Nagusiaren gomendioen artean dago.
