Garai desberdinetako materialen, irudien eta teknologien batuketa horren bidez, artista gipuzkoarraren erakusketak «materiaren eta irudien etengabeko eraldaketari buruzko esplorazioa planteatzen du»
Gasteizko Montehermoso Kulturuneak Ivan Gomez artista irundarraren ‘Kliskada bat’ izeneko instalazioa inauguratuko du ostiralean, uztailaren 10ean. Ur Biltegi Zaharrerako berariaz diseinatua, begiak itxi eta irekitzeko eguneroko keinua hartzen du abiapuntutzat, munduarekin dugun harremana zeharkatzen duten aldaketei buruzko hausnarketa proposatzeko, eta irailaren 20ra arte bisitatu ahal izango da.
Sonia Diaz de Corcuera Gasteizo Udaleko Kultura eta Hezkuntzako zinegotziak aurkezpenean adierazi duenez, «instalazioak collageak, eskulturak, ehunezko piezak, argi gailuak, diapositibak eta elementu organikoak biltzen ditu, espazioaren arkitekturarekin elkarrizketan hedatzen direnak».
Garai desberdinetako materialen, irudien eta teknologien batuketa horren bidez, artista gipuzkoarraren erakusketak «materiaren eta irudien etengabeko eraldaketari buruzko esplorazioa planteatzen du». Inaugurazioa 19:00etan izango da, egilea bertan dela, eta irailaren 20ra arte bisitatu ahal izango da.
Artista, zinemagile, idazle eta komisarioa da Ivan Gomez irundarra, eta irudien, objektuen, espazioen eta pertsonen arteko harremanetan oinarritutako diziplinarteko lanketa egiten du. Bere ibilbidea Azkuna Zentroa, Tabakalera edo La Capella erakunde eta sorkuntza zentroekin «elkarrizketan garatu da», besteak beste, eta bere lana nazioarteko hainbat lekutan ere ikusgai izan da, hala nola Medellinen, Berlinen, Gantesen edo New Yorken, ondorioztatu dute bertatik berriki egindako prentsa ohar baten bitartez.
