Gasteizko Liburu Azoka berreskuratuko da
Gasteizko Udaleko Kultura eta Hezkuntza Sailak, 2026an, Liburu Azoka berreskuratzea izan du erronketako bat. Asteazken honetan, “aurrerapauso handia” eman da helburu hori lortzeko, udazkenean egingo den ekitaldia antolatzeko idazkaritza teknikoaren kontratazioa abiatu delako. Esleipendunak ekitaldia antolatzeaz, ekoizteaz, koordinatzeaz eta gauzatzeaz arduratuko da.
Sonia Diaz de Corcuera kulturako zinegotziaren hitzetan, esleipendunak jakin behar du azoka tokikoa izan behar dela, Gasteizko liburu denden eta kultur eragileen parte-hartzea sustatu behar duela, eta hiriko literatur sektoreren ikusgarritasuna eta dinamizazioa bultzatu beharko dituela.
Gainera, kontratatutako enpresak kultur programazio anitza eta askotarikoa diseinatu beharko du, liburuen aurkezpenak, egileekin topaketak, eta publikoarentzako jarduerak barne.
Horrekin batera, literaturarekin lotutako tokiko kolektiboak, artistak eta kultur eragileak inplikatu beharko ditu, herritarren parte-hartzea eta Gasteizko literatur ekosistemaren dinamizazioa bultzatzeko helburuarekin, liburu dendak, argitaletxeak, egileak eta beste kultur eragile batzuk elkarlanean arituz.
2024-2028ko Kultura Plan Estrategikoak “Gasteiz kultur erreferente gisa posizionatzea” helburua jasotzen du, eta horretarako, erreferentziako kultur ekitaldiak antolatzea aurreikusten da, horietako bat Gasteizko Liburu Azoka izanik.
Gasteizko Liburu Azoka urteak lanean egon da, eta kultur programazioan finkatuta zegoen. Hala ere, ekitaldia etenduta egon da azken urteetan, eta hutsune bat sortu da kultur egutegian. Horregatik, Liburu Azokaren berritzearen bitartez, udazkenean hutsune hau beteko da.
