Zerrendan 66 ageri dira, guztira 184.320.565,73 euro ordaindu gabe utzi dizkiotenak Arabako erakundeari
Arabako Foru Ogasunak 2025eko abenduaren 31n 600.000 euro baino gehiagoko zerga zorrak edo zehapenak zituzten zergadunen zerrenda argitaratu du astearte honetan www.araba.eus webgunean eta https://www.araba.eus/publicar/listadodeudores/listadodeudor… estekan. Zerrendan 66 ageri dira, guztira 184.320.565,73 euro ordaindu gabe utzi dizkiotenak Arabako erakundeari.
Foru erakundeak jakinarazi duenez, argitaratu den zerrendan agertzen diren 66 zordunetatik 57 pertsona juridikoak (56 merkataritza sozietate eta aldi baterako enpresen batasun bat) eta bederatzi pertsona fisikoak dira; aurreko urtearekin alderatuta, sei berri gehitu zaizkio zerrendari, lau sozietate eta bi pertsona fisiko, hain zuzen ere.
Era berean, 66 zordunetatik 31 hartzekodunen konkurtsoan sartuta daude edo egon dira, eta 31 zordun horiek metatutako zorraren proportzioa zerrendan argitaratutako guztizkoaren %59,84 da.
Zordunak pertsona fisikoak diren kasuetan (bederatzi daude zerrendan), haien izen-abizenak eta NAN zenbakia ematen dira identifikatzeko; denen artean 35,6 milioi euroko zorra dute. Pertsona juridikoei eta entitateei dagokienez, sozietatearen izen osoa eta identifikazio fiskaleko zenbakia argitaratzen dira; zerrendan 57 entitate daude, guztien artean 148,7 milioi euro ordaindu ez dituztenak.
Ordaintzeke dauden zor eta zehapenen baterako zenbatekoa ere agertzen da zerrendan. Hala ere, zerrendan ez dira agertzen 600.000 eurotik gorako zorra duten zordun guztiak, ez dira sartu atzeratuta, zatituta edo etenda daudenak, ezta ordaintzeko borondatezko epean daudenak ere.
Zordunei buruzko informazioa publikoa izango da, hiru hilabetez. Era berean, Datuak Babesteko Legea betez, Foru Ogasunak beharrezko neurriak hartu ditu edukiak eskuragarri ez egoteko Interneteko bilaketa motorren bidez.
