Ekitaldian, bide batez, ekimenari emandako babesa erakutsi dute
COP31 Bike Ride klimaren aldeko munduko bizikleta martxa handia Gasteizera eta Arabara iritsi da ostiral honetan, eta partaideei harrera egin diete Maider Etxebarria alkateak eta Jon Nogales Mugikortasun Jasangarriko eta Azpiegituretako foru diputatuak, besteak beste. Ekitaldian, bide batez, ekimenari emandako babesa erakutsi dute.
«COP31 Bike Ride ekimenarekin bat egiten dugu, bere helburua partekatzen dugulako: hiri osasungarriagoetarantz, jasangarriagoetarantz eta klima aldaketaren aurkako borrokarekin konprometituagoetarantz aurrera egitea», adierazi du Maider Etxebarriak.
Gasteiz bizikleta bidezko mugikortasuna lehentasun bihurtu duten hirietako bat dela gogorarazi du alkateak: «Bizikleta funtsezko tresna da garraioaren emisioak murrizteko eta mugikortasun jasangarriagorantz aurrera egiteko. Horregatik, gure hirian 200 kilometro inguruko bidegorri sare osoa diseinatu dugu».
Bestalde, Jon Nogalesek iragarri du Arabako Foru Aldundiak COP31 Bike Ride programarekin bat egingo duela, lantokietara eta ikasketa tokietara ibilbide laburreko hiriarteko joan-etorriak egiteko garraiobide gisa bizikletaren erabilera sustatzeko politikak bultzatzen jarraitzeko konpromisoarekin.
«Bizikleta Bideen Sarea zabalduko dugu, arabarrei bizikletaren erabilera errazteko, lantokietara eta zerbitzuetara ibilbide laburreko hiriarteko joan-etorriak egiteko garaian. Hala, 2027an Eltziego-Guardia bideko obrak hasiko ditugu, eta lurraldeko ikasleen artean sentsibilizazio programa indartuko dugu», azpimarratu du.
Ekitaldian eskerrak eman ditu COP31 Bike Ride ibilbidean parte hartzen ari den Pedro Vallejok; bera arduratuko da mugara iristean lekukoa emateaz.
