Viterok adierazi du «oinarrizko bi helburu» beteko dituztela
Gasteizko Udalak 35.900 euro inbertituko ditu Erdi Aroko Hiriguneko Merkataritza eta Zerbitzuen Federazioak (FEDASOC) hileko lehen larunbatean antolatzen duen Almendrako Merkatua eguneratzeko. Udal gobernuak EH Bildurekin aurten hitzartutako aurrekontu akordioari esker bideratuko da egitasmoa.
Almendrako Merkatuaren Biziberritze Plana aurkezteko asteazken honetan egindako prentsaurrekoan izan dira Maria Nanclares Ekonomia Sustapen, Enplegu, Merkataritza eta Turismo zinegotzia eta Rocio Vitero EH Bildu taldeko bozeramailea. Mari Mar Ortiz FEDASOCeko presidentea eta Patricia Garcia Gasteiz On elkarteko gerentea ere izan dira bertan.
«Gure helburua da Almendrako Merkatuari eduki eta sakontasun handiagoa ematea, gure hirian dagoeneko finkatuta dagoen ekitaldia baita, duela bi hamarkada auzoa biziberritzeko eta tokiko produktua sustatzeko sortu zena. Bultzada berria emateko unea da, erakargarritasuna sustatzeko, bai gasteiztarrentzat, bai Arabako hiriburua bisitatzen dutenentzat. Urtean 75.000 pertsona baino gehiago biltzen ditu hitzordu horrek», adierazi du Nanclaresek.
Era berean, Viterok adierazi du «oinarrizko bi helburu» beteko dituztela. Alde batetik, tokiko merkataritza bizirik mantentzen laguntzea apatu du, saltoki txikiei laguntzeko gunea delako, produktuen zuzeneko salmenta ahalbidetzen duena. «Bestalde, Gasteizko zein kanpoko pertsonak gure erdigunea bisitatzera erakarriko ditugu, eta Alde Zaharra topagune bihurtuko da, eta horrek hirigune historikoa biziberritzea dakar. EH Bilduk merkatu hauen aldeko apustua egiten du, haien balio kultural, sozial eta historikoari esker, gure almendraren bizitza eta merkataritzaren bizitza mantentzen laguntzen baitute», azaldu du.
Almendrako Merkatuak Alde Zaharra sustatzen du leku dinamiko eta aktibo eta merkataritza eskaintza berezidun toki gisa. Gainera, gasteiztarrak eta bisitariak auzora eta bertako merkataritza eta ostalaritza eskaintzara hurbiltzeko pertsona fluxuak sortzen eta hurbileko merkataritzan erosketak bultzatzen ditu. Udalak 60.000 euro inguru jartzen ditu urtero udal aurrekontutik ekitaldi horretarako.
Udal Gobernuak EH Bildurekin 2026an adostutako aurrekontu-akordioari esker, Udalak 35.900 eurotan handituko du bere ekarpena, bertan berrikuntzak ezartzeko. Espazio hori dinamizatu nahi duen programazioak haurrentzako jarduerak biltzen ditu, hala nola tailerrak eta kaleko dinamizazio ekintzak, baita publiko guztiarentzako proposamenak ere, besteak beste, magia saltokietan eta ostalaritzako lokaletan, kale antzerkia, musika dinamizazioa eta gastronomia sustatzeko ekintzak.
Proiektu horren barruan sartzen da, halaber, merkatuaren seinaleak eta irudia hobetzea, informazio posturako ‘roll up’ berrituak diseinatuz eta editatuz, baita ‘plotter’ publizitario bat ere, Andre Maria Zuriaren plazan.
