Gasteizko Udaleko gobernu batzordeak onartu du hiriko espazio publikoa mantendu, kontserbatu, konpondu eta hobetzeko zerbitzu berria kontratatzeko espedientea. Kontratuak urtean gehienez 1.910.000 euroko aurrekontua du, eta zortzi sortatan egituratuko da, hiriko eremu bakoitzeko bat, hiri osoan erantzun hurbil eta arina bermatzeko. Hasiera batean urtebeteko iraupena izango du, eta gehienez beste hiru urtez luzatu ahal izango da.
Akordioaren bidez, Gasteizko Udalak argi berdea eman dio Berehalako Ekintza Brigaden zerbitzua ematen jarraitzea ahalbidetuko duen kontratuaren lizitazioari. Horiek dira kale, plaza eta beste espazio publiko batzuetan gertatzen diren kalte eta gorabeheren aurrean azkar esku hartzeaz arduratzen diren taldeak.
Berehalako Ekintza Brigadek azkar jarduteko aukera ematen dute premiazko konponketa eskatzen duen gorabehera bat sortzen denean, batez ere segurtasunari edo irisgarritasunari eragin diezaiokeenean. Ohiko jarduketen artean, hondatutako baldosa eta espaloiak, zintarriak, kutxatilak, zoladurak, irisgarritasun elementuak edo espazio publikoa kontserbatzeko eta hobetzeko jarduketa txikiak konpontzea daude.
«Berehalako Ekintza Brigadak funtsezko baliabideak dira hiria egoera onean mantentzeko eta egunerokoan sortzen diren gorabeherei erantzun azkarra emateko. Kontratu berri honekin, konponketak lehenago iristeko eta gure auzoak eta partekatzen dugun espazio publikoa zaintzen jarraitzeko dugun jarduteko gaitasuna indartu dugu», azaldu du Beatriz Artolazabal Espazio Publikoaren eta Auzoen zinegotziak.
Gorabeherei berehalako arreta ematea bermatzeaz gain, kontratu berriak antolaketa hobekuntzak eta kudeaketa tresnak barne hartzen ditu, lanen kontrol eta jarraipen handiagoa egiteko eta mantentze lanen plangintza eraginkorragoa egiteko. Horrez gain, ezohiko egoerei erantzuteko baliabide gehigarriak ere aurreikusi ditu, hala nola neguko bidezaintzako gertakariei erantzutea.
