Acciona enpresak arduratuko da hurrengo hamarkadan Gasteizko bideen garbiketaz eta hondakinen bilketaz
Maider Etxebarria Gasteizko alkateak iragarri du Lakua-Arriaga eta Ariznabarra auzoetako kaleek estreinatuko dituztela kontrata berria irailetik aurrera egiten hasiko den auzoetako garbiketa lan intentsiboak.
Acciona enpresak arduratuko da hurrengo hamarkadan Gasteizko bideen garbiketaz eta hondakinen bilketaz, eta auzoetako garbiketa intentsiboa da gehituko den zerbitzu berrietako bat. «Zerbitzuaren helburua urtean zehar egin ohi den garbiketa lana osatzea da. Zerbitzuak astebeteko iraupena izango du auzo bakoitzeko, eta txandaka egingo da, auzo bakoitzean urtero zerbitzu bat emanez», azaldu du alkateak.
Auzoetako garbiketa lanetan dozena bat zerbitzu egin beharko dira, hala nola eskuzko ekorketa eta ekorketa motorizatua, espaloi eta galtzaden ekorketa mekanikoa (makina hidrogarbitzaile bat ere beharko da horietarako), zoladurak garbitzea, pintadak kentzea, paperontziak mantentzea eta asfaltoaren, hormigoiaren eta baldosen artean pilatzen diren hostoak eta landaredi adbentizioa garbitzea.
Zerbitzuok berariazko makineriarekin osatuko dira, hala nola galtzadak ekortzeko makina dual batekin. Presiozko ura duten bi pertika dituen makina da, eta bi peoik egiten dute lan horrekin. Moldakortasun handia du, depositua eta mahuka duen pertika baititu, eta langile batek bideratuta, espaloiko zikinkeria makinara eraman dezake.
Garbitasuna bereziki zainduko da ekipamendu handiek iristerik ez duten tokietan, besteak beste, arkupeetan, etxadietan eta plazetan, fatxadetako koloma, ertz eta aurrealdeetan, arkupeetan eta pixarekin zikintzen diren gune batzuetan. Desinfektatzaileak eta usaina ematen duten produktuak erabili beharko dira lanotarako.
Auzoan garbiketa zerbitzua egin aurretik, bizilagunei horren berri emango zaie, jarduketa eremu bakoitzean hilabete lehenago jakinarazita. Jakinarazpena atarietan eta lokal komertzialetan jarritako kartelen bidez egingo da. Garbiketa lanak egiteko aparkalekuak erreserbatzea aurreikusita dago, hobeto jardun ahal izateko.
