Osalanek laneko ongizatea sustatzeko kanpaina berri bat aurkeztu du
Gaur, Osalanek lan-arriskuen prebentzioari buruzko sentsibilizazio-kanpaina berri bat aurkeztu du, bihar ospatuko den Laneko Segurtasun eta Osasunaren Munduko Egunaren esparruan. Ekimen honekin, Osalanek bat egiten du Lanaren Nazioarteko Erakundeak eta Laneko Segurtasun eta Osasunerako Europako Agentziak nazioartean bultzatutako ekintzekin, lan-ingurune psikosozial osasungarriak bermatzea helburu.
Kanpainaren leloa, “Laneko ongizatea sustatzen dugu“, Elena Pérez Barredo, Lan eta Gizarte Segurantzako sailburuordeak, eta Lourdes Íscar Reinak, Osalaneko zuzendari nagusiak, aurkeztu dute. Ongizate fisikoa, mentala eta soziala dira laneko arriskuen prebentzioan funtsezko ardatzak, eta lanaren etorkizunean ere garrantzi handia dute.
Espainiako Gobernuak 2026. urtea Laneko Segurtasun eta Osasunaren Urtea izendatu du, Laneko Arriskuen Prebentzioari buruzko Legearen 30. urteurrena
Osalanek adierazi du arriskuen prebentzioa araudiaren betetzeaz gain, lanaren alderdi fisikoetatik harago joan behar dela, eta erakundeen eguneroko kudeaketan benetan integratu beharra dagoela. Horretarako, komunikazio argia, prebentzio-ikuspegia eta langileen parte-hartze aktiboa funtsezkoak dira laneko ongizatea eta osasuna babesteko.
Kanpaina honekin, Osalanek prebentzio integratu eta proaktibo baten aldeko apustua berretsi du, kalteak saihesteaz gain, osasuna, ongizatea eta lan-ingurune seguruak sustatuko dituena.
