Arabak kultura espazio independenteen sarea babesten du
Vitoria-Gasteiz, 2026ko uztailaren 31a. Arabako Foru Aldundiak, Kultura eta Kirol Sailaren bidez, dirulaguntza deialdi berri bat onetsi du kultur espazio independenteak bultzatzeko. Ekimen honen helburua da arte sorkuntza babestu eta kultura ehuna indartzea lurraldean, baita Trebiñuko enklabean ere.
Laguntza lerro honek 100.000 euroko zuzkidura izango du, espazio kultural independenteen garrantzia aintzat hartzen baitu, sorkuntza artistikoaren, ikerketaren eta kultura bitartekaritzaren motor gisa. Mota horretako espazioen kudeatzaileei zuzenduriko laguntzak emango dira, lurraldean parte-hartze kultuala sustatuko duen sare bat eratuz.
Arte bisualak, eszenikoak, musika, literatura, ikus-entzunezkoak edo bertsolaritza bezalako esparruetan proiektuak garatzeko laguntzak jasoko dira, 2026ko urtarrilaren 1etik abuztuaren 30era bitartean. Deialdia 2026ko abuztuaren 31n argitaratuko da eta eskabideak aurkezteko epea 15 egun baliodunekoa izango da 2026ko irailaren 1etik aurrera.
Dirulaguntzak emateko prozesua norgehiagoka bidez egingo da eta, ebazpena seihileko epean emango da, alegia, 2027ko otsailaren 28a baino lehen.
Ekimen honekin Arabako Foru Aldundiak kultura eredu anitz, hurbil eta egituratu baten aldeko apustua berresten du, espazio independenteek lurralde osoko berrikuntza, esperimentazio eta dinamizazio kulturalean duten balio handia aitortuz.
