Gasteizko Udalak hiriko sari gorena emango dio LEA Lascarayri
Gasteizko Udal Bozeramaileen Batzordeak aho batez erabaki du berriki hiriko Urrezko Domina LEA Lascaray enpresari ematea. Euskadiko enpresarik zaharrena eta Espainiako Estatuko zaharrenetakoa da, 203 urteko historiarekin, Gasteizko Udaletik nabarmendu dutenez.
Maider Etxebarria alkateak proposatu zuen saria enpresa gasteiztarrari ematea, eta ekitaldia abuztuaren 5ean izango da, Andre Maria Zuriaren jaietako egun handian, Goiuri jauregian egingo den ekitaldian.
Aintzatespenaren bidez, Lascarayk Gasteizko garapen ekonomiko eta sozialari egindako ekarpena nabarmendu nahi da, baita duela urtebete baino gehiago Arriagako Atea kaleko fabrika suntsitu zuen sutearen ondoren duen erresilientzia gaitasuna ere.
Izan ere, enpresa bere jarduerari eusteko gai izan da Eskalmendin egokitutako behin-behineko instalazioetan, Jundizen, Udalak eskainitako lurretan, fabrika berria eraikitzen ari den bitartean. Lanak duela 15 egun hasi ziren 21. sektorean, eta 45.000 metro karratuko ekoizpen azalera izango duten instalazioak eraikiko dituzte bertan.
Udal taldeetako bozeramaileentzat, «errautsen berpizte honek Lascarayk Gasteizen eta Arabako industria sarearen erreferente izaten jarraitzeko duen gaitasuna eta determinazioa sinbolizatzen ditu, industria moderno, berritzaile eta jasangarri baten garapenean lagunduz«.
Horrela, Gasteizko Udalak hiriko sari gorena emango dio LEA Lascarayri, bi mendetik gorako ibilbidea, tokiko garapen ekonomiko eta industrialari egindako ekarpena eta azken urtean erakutsitako suspertzeko gaitasuna aitortuz.
