Arabako Mugikortasun Agintaritzak etorkizuneko Garraio Partzuergoa sortzeko bide-orria onartu du, eta erakundea 2027ko lehen seihilekoan eratzea aurreikusten da
Arabak garraio publikoaren kudeaketa bateratzeko urrats erabakigarria egin du. Arabako Mugikortasun Agintaritzak etorkizuneko Garraio Partzuergoa sortzeko bide-orria onartu du, administrazioen arteko koordinazioa indartzeko, mugikortasun politikak modu bateratuan planifikatzeko eta 2027an erakunde berria martxan jartzeko helburuarekin.
Hala, Arabako Mugikortasun Agintaritzak etorkizuneko Arabako Garraio Partzuergoa eratzeko prozesua zehazten duen bide-orria onartu du astelehen honetan. Lurraldean mugikortasunean eta garraio publikoan eskumena duten administrazioen arteko koordinazioa indartuko duen erakundea eratzeko proiektu estrategikoaren baitako «mugarri berria» da onespena, Gasteizko Udaletik jakinarazi dutenez.
Akordioa Arabako Mugikortasun Agintaritzaren osoko bilkuran hartu da. Agintaritza horren presidentea Gasteizko Udala da gaur egun, eta Eusko Jaurlaritzaren, Arabako Foru Aldundiaren eta Gasteizko Udalaren babesa izan du, hau da, lankidetza organoa osatzen duten hiru erakundeena.
Arabako Garraio Partzuergoak egungo Mugikortasunaren Agintaritzaren bilakaera ekarriko du, eta lurraldeko mugikortasuneko eta garraio publikoko politikak elkarrekin planifikatu, koordinatu eta kudeatzeko tresna iraunkor gisa finkatuko da.
Onartutako bide-orriak partzuergoa egikaritzeko datozen hilabeteetan garatu beharko diren faseak ezarri ditu, eta Arabako Foru Aldundiari atxikita geratuko da. Lehenengo lanak erakundearen egitura juridikoa definituko duten behin betiko estatutuak idaztea eta haren gobernantza eredua diseinatzea izango dira.
Onartutako plangintzak aurreikusten du Arabako Garraio Partzuergoaren eraketa juridikoa 2027ko lehen seihilekoan egingo dela, aurreikusitako izapide administratibo eta instituzionalak amaitu ondoren. Une horretatik aurrera, bide-orrian jasotako jarduera teknikoak, teknologikoak eta antolaketakoak garatzen jarraituko du, pixkanaka, eredu berriaren ezarpena osatu arte.
